گونگی محبت
گونگی محبت
وہ دونوں جوان تھیں اور ظاہر ہے کہ جوانی کی بہار آفرینی ہر نسوانی پیکر کے خدوخال میں ایک خاص شگفتگی اور ایک خاص دلآویزی پیدا کردیتی ہے۔۔۔ چنانچہ وہ دونوں حسین بھی تھیں۔ دونوں کے قد بھی قریباً قریباً یکساں تھے۔ دونوں کی عمروں میں بھی کوئی خاص فرق نہ تھا۔ ایک کی عمر سولہ سال کے قریب ہوگی۔ اور دوسری کی سترہ یا اٹھارہ کے لگ بھگ۔ مگر ان چیزوں کے باوجود دونوں میں بہت بڑا فرق تھا۔ ایک کو فطرۃ حق حاصل تھا کہ وہ خوف ہنسے اور ہر وقت ہنستی رہے۔ اور دوسری دنیا میں صرف اس غرض سے پیدا ہوئی تھی کہ وہ خواہ ہنسے یا روئے لیکن دوسروں کو ضرور ہنسائے۔ ایک اشاروں میں احکام صادر کرتی تھی اور دوسری ان احکام کی بے چون و چرا تعمیل کردیتی تھی اور سب سےبڑھ کر یہ ایک کی زبان اس کے منہ میں تھی اور دوسری کی زبان اس کے ہاتھوں کے اشاروں میں!
ایک کا نام تھا اندرا۔۔۔ کاغذ کی ایک مشہور فرم کے واحد مالک سیٹھ بدری پرشاد کی اکلوتی بیٹی۔۔۔ دوسری کا نام تھا جیوتی۔۔۔ لیکن یہ نام ایک شخص بھی نہ جانتا تھا۔ آخر ایک گونگی لڑکی کانام معلوم کرنے کی ضرورت بھی کیا ہے؟ جس طرح ہر شخص گونگی کے نام سے واقف تھا۔ اسی طرح وہ یہ بھی نہیں جانتا تھا کہ وہ کس خاندان سے تعلق رکھتی ہے اور اس کے والدین کون تھے۔ اندرا نے دو ایک بار اس کے خاندانی حالات معلوم کرنےکی معمولی کوشش کی۔ مگر جب دیکھا کہ اس سلسلے میں ہر کوشش فضول ہے۔ تو اس نے جانچ پڑتال کرنے کا ارادہ ہی دل سے نکال دیا۔
کوئی عورت بھی خاص طور پر اپنی خادمہ کے خاندانی حالات معلوم کرنے کے لیے زیادہ تگ و دو نہیں کرتی۔ پھر اندرا کو کیا پڑی تھی کہ وہ اپنی گونگی خادمہ کے حالات دریافت کرتی؟ اس کے لیے یہی کافی تھا کہ اس کے گھر میں ایک گونگی لڑکی زندگی کے دن گزار رہی ہے جو اس کی خادمہ بھی ہے اور ذریعہ تفریح بھی۔
دونوں کی پہلی ملاقات عجیب انداز میں ہوئی تھی۔۔۔!
ایک دن اندرا کالج سے واپس آئی تو اس نے دیکھا کہ گلی کے ایک حصے میں چند عورتیں اور بچے کھڑے ہنس رہے ہیں۔ وہ وہاں پہنچی تو معلوم ہوا کہ ایک گونگی بھکارن ہجوم میں کھڑی گھبرا رہی ہے۔ جب اندرا نے گونگی کے متعلق کچھ دریافت کیا تو معلوم ہوا کہ اس کے والدین بچپن میں فوت ہوگئے تھے۔ اور اب وہ اپنے دور کے ایک رشتہ دار کے ساتھ بھیک مانگ مانگ کر اپنا پیٹ پالتی ہے۔۔۔ یہ دور کا رشتہ دار ایک بوڑھا تھا جو اس کے ساتھ ہی کھڑا تھا۔
اندرا نے بوڑھے سے کہا کہ وہ کسی دن گونگی کواس کے مکان پر لائے۔ وہ ’’گونگی‘‘ سے ’’باتیں‘‘ کرنا چاہتی ہے۔
بوڑھا پاگل تھا۔ جو اس زریں موقعے سے فائدہ نہ اٹھاتا؟ وہ دوسرے ہی دن گونگی کو سیٹھ بدری پرشاد کے عالیشان مکان پر لے آیا۔
چند لمحوں کے بعد گھر کے لوگ اس کے ارد گرد کھڑے تھے۔
اب گونگی ہے کہ کمرے کی ہر چیز کو بڑی حیرت سے دیکھ رہی ہے اور لوگ ہیں کہ اس کی ہر حرکت سے لطف اندوز ہو رہے ہیں۔ اندرا تو اس کی حرکات سے اس قدر محظوظ ہوئی کہ اس نے بوڑھے سے کہہ دیا:
’’اگر تمہیں کوئی اعتراض نہ ہو تو گونگی کو یہیں رہنے دو۔ اس کے تمام اخراجات کی ذمہ داری ہم پر عاید ہوگی۔ تمہارے گزارے کے لیے بھی کچھ نہ کچھ ماہانہ دے دیا کریں گے۔‘‘
بوڑھے نے یہ بات بخوشی مان لی اور گونگی اندرا کے یہاں رہنے لگی۔
اسے وہاں رہتے ابھی چند ہی ماہ گزرے ہوں گے کہ وہ گھر کی فضا سے پوری طرح مانوس ہوگئی۔ اب نہ تو اسے اشاروں کے ذریعے اپنا مافی الضمیر بتانے میں کوئی دقت محسوس ہوتی تھی اور نہ گھر والو ں کو اس کے اشاروں کا مفہوم سمجھنے میں کسی تکلیف کا سامنا کرنا پڑتا تھا۔
گونگی میں جہاں اور خوبیاں تھیں۔ وہایہ خوبی بھی تھی کہ وہ گھر کہ ہرفرد کا دل و جان سے احترام کرتی تھی۔ یہ خوبی کسی اور خادمہ میں ہوتی تو گھر کے لوگ اس کی بہت قدر کرتے مگر نہ معلوم کیا بات تھی کہ ان تمام خوبیوں کے باوجود گونگی کو۔۔۔ صرف گونگی ہی سمجھا جاتا تھا اور گونگی سمجھتے وقت سمجھنے والوں کی نگاہوں کے سامنے اس کی ’’مضحکہ خیز حرکات‘‘ ہوتی تھیں، خوبیاں نہیں۔
اندرا اس کی خوبیوں سے کافی متاثر تھی۔ اور جب وہ اس سے باتیں کرتی تو سب کچھ بھول کر اسے محض ایک ذریعہ تفریح سمجھنے لگتی۔ تاہم گونگی کو اس کی کوئی شکایت نہ تھی۔۔۔ کوئی شکوہ نہ تھا۔
(۲)
عام تعلیم یافتہ اور روشن خیال امیرزادیوں کی طرح اندرا کو بھی فنون لطیفہ سے دلچسپی تھی۔ بالخصوص فن مصوری میں تو اس کی دلچسپی کا یہ عالم تھا کہ کسی اعلیٰ پایہ کی تصویر کے حصوں میں اگر اسے بڑی سے بڑی رقم بھی صرف کرنا پڑتی تھی تو وہ بے دریغ صرف کردیتی تھی۔ چنانچہ یہی وجہ تھی کہ جب اس نے اخبارات میں ایک شاندار نمائش کا اعلان پڑھا تو اس کی خوشی کی کوئی انتہا نہ رہی۔۔۔ اخبارات میں جواعلان شائع ہوا تھا۔ اس میں درج تھا کہ نمائش گاہ میں جاں مرحوم مصوروں کی تصویریں دکھائی جائیں گی وہاں پبلک کو ملک کے موجودہ مصوروں کے خاص کارناموں سے بھی روشناس کرایا جائے گا۔
اس اعلان نے اندرا کےدل و دماغ میں ایک ہیجان برپا کردیا۔ اور وہ بڑی بے تابی سے دسمبر کے آخری ہفتے کا انتظار کرنے لگی۔
خدا خدا کرکے انتظار کی کٹھن گھڑیاں ختم ہوئیں۔ اندرا نمایش کے پہلے روز ہی اپنی چند سہیلیوں اور گونگی کو ساتھ لے کرنمائش گاہ میں پہنچ گئی۔ اور سب سے پہلے اس نے آرٹ گیلری ہی کی طرف قدم بڑھایا۔ اس کی سہیلیاں تو چند منٹ میں چند تصویروں کا جائزہ لینے کے بعد کرسیوں پر بیٹھ گئیں۔ مگر اندرا ہر تصویر کو اس دلچسپی اور اس محویت سے دیکھ رہی تھی کہ معلوم ہوتا تھا شام تک وہ کسی اور طرف توجہ ہی نہیں کرے گی۔ یکایک اسے محسوس ہوا کہ وہ ان تمام تصویروں کو دیکھ چکی ہے۔ جو آرٹ گیلری میں موجود ہیں۔۔۔ ایک خاص حسرت کے انداز میں اس نے آخری تصویر سے نگاہیں ہٹائیں اور اپنی سہیلیوں کے پاس آبیٹھی!
ابھی اسے بیٹھے ایک منٹ ہی گزرا ہوگا کہ اس کی ایک سہیلی بولی:
’’تم تو خیر آرٹ کی ہو ہی بڑی دلدادہ۔ لیکن تمہاری گونگی آرٹ پرستی میں تم سے بھی دو قدمگے نکل گئی ہے۔‘‘
اندر حیرت سے اپنی سہیلی کو د یکھنے لگی۔ سہیلی نے اس کا ہاتھ پکڑا اور اسے ایک کونےمیں لے گئی۔ اب اندرا نے دیکھا کہ خدا کی وہ عجیب مخلوق۔۔۔ گونگی بڑی دلچسپی سے ایک تصویر دیکھ رہی ہے۔
’’کیوں نہ ہو، آخر ملازمہ کس کی ہے؟‘‘ اس کی سہیلی بولی۔
اندرا نے آگے بڑھ کر اپنا ہاتھ گونگی کےکندھے پر دکھ دیا۔ گونگی پلٹی اور جس طرح بجھتے ہوئے چراغ کی روشنی مدھم پڑتی جاتی ہے، اسی طرح اس کی آنکھوں کی روشنی غائب ہونےلگی۔
اندرا نے گونگی کے چہرے سے نظریں ہٹاکر تصویر کو دیکھا۔۔۔ اور یہ دیکھ کر اسے حیرت بھی ہوئی اور مسرت بھی کہ یہ تصویر گیلری کی بہترین تصویر ہے۔ ایسی تصویر اس نے اپنی تمام عمر میں نہیں دیکھی تھی۔ وہ دل ہی دل میں گونگی کا شکریہ ادا کرنے لگی کہ اسی کی وجہ سے وہ ایسی کامیاب تصویر دیکھ رہی تھی۔ ورنہ وہ تو بزعم خویش تمام تصویریں دیکھ کر واپس جارہی تھی۔
اس تصویر میں رنگوں کے نہایت دلآویز امتزاج سے دکھایا گیا تھا کہ ایک اندھی لڑکی ایک نوجوان کے پاؤں پر اس طرح گر پڑی ہے کہ اس کی بانہیں اپنے محبوب کی ٹانگوں کے گرد حمائل ہوگئی ہیں۔
تصویر کے نیچے لکھا ۔ ’’ایک راز کا انکشاف۔‘‘
اس تصویر نے اندرا کو بہت متاثر کیا تھا اور وہ چاہتی تھی کہ مصوری کے اس بے نظیر نمونے کو ہر وقت دیکھتی رہے۔۔۔ ہر گھڑی دیکھتی رہے۔ آخر اس نے نمایش گاہ کے منتظم سے مصور کا نام اور پتہ پوچھا۔ اور گھر روانہ ہوگئی۔
ایک ہفتے کے بعد ایک نوجوان جس کے لباس سے غربت ٹپک رہی تھی، اندرا کے سامنے کھڑا تھا۔
’’کیا آپ کا نام دیپک ہے۔ اور آپ ہی کے موقلم کی معجز اثر جنبشوں کانتیجہ ہے۔ ایک راز کا انکشاف؟‘‘ اندرا نے اس سے پوچھا۔
’’جی ہاں! میرا ہی نام دیپک ہے۔ ذرّہ نوازی کا شکرگزار ہوں۔ میں سمجھتا ہوں اس میں کوئی خاص خوبی موجود نہیں ہے۔ یہی وجہ ہے کہ کسی شخص نے بھی اس تصویر کو خریدنا تو ایک طرف رہا اس کی تعریف میں بھی دو لفظ نہیں کہے۔ میں مایوس ہوچکا تھا۔ مگر اب یہ دیکھ کر کہ دنیا میں میرے آرٹ کے بھی قدردان موجود ہیں۔ میری ہمت بندھ گئی ہے۔۔۔ غالباً آپ نے نمایش گاہ کے منتظم سے تصویر خریدنے کا ارادہ ظاہر کیا تھا۔‘‘ مصور نے سب کچھ ایک ہی سانس میں کہہ دیا۔
’’ہاں میں اس تصویر کو خریدنا چاہتی ہوں۔ مگر متنظم سے نہیں خریدوں گی۔ اگر آپ اسے اپنی توہین نہ سمجھیں تو میں عرض کردوں کہ یہ تصویر میں براہ راست مصور سے حاصل کرنے کا شرف حاصل کروں گی۔‘‘
فرطِ مسرت سے مصور کا چہرہ سرخ ہوگیا۔
’’ہاں میں ایک اور بات پوچھنا چاہتی ہوں۔ آپ کو معلوم ہوچکا ہے کہ مجھے فن مصوری سے بری دلچسپی ہے۔ آج تک تصویروں کو فراہم کر کر کے اپنا شوق پورا کرتی رہی۔ اب میری آرزو یہ ہے کہ خود بھی کاغذ کو داغدار بنانے کی کوشش کیا کروں۔۔۔ اگر آپ کو کوئی عذر نہ ہو تو پتاجی سے دریافت کر لوں؟‘‘
’’میں آپ کا مفہوم نہیں سمجھ سکا۔ معاف کیجیے گا!‘‘ مصور نے گھبراہٹ میں کہا۔
’’آپ سمجھ گئے ہیں۔۔۔ فن مصوری میں آپ میرے استاد ہوں گے۔‘‘
’’مجھے اس میں کوئی عذر نہیں!‘‘
’’تو چلیے پتاجی کے پاس!‘‘ اندرا نے مسکرا کر کہا۔
بھلا سیٹھ بدری پرشاد اپنی اکلوتی بیٹی کی خواہش کو ردّ کر سکتا تھا؟
(۳)
مصور دیپک ہر روز وقت مقررہ پر کوٹھی میں آتا۔ اور اپنا فرض پورا کرکے چلا جاتا۔۔۔ کئی ہفتے گزر گئے اور اس مدت میں بے تکلفی تو رہی ایک طرف اس نے بغیر کسی شدید ضرورت کے کسی سے بات بھی نہ کی۔ اس کے باوجود کوٹھی میں ایک ایسی ہستی بھی موجود تھی جو کسی نہ کسی حدتک اس سے بے تکلف ہوگئی تھی۔۔۔ یا بے تکلف ہوتی جا رہی تھی۔ اور وہ ہستی تھی گونگی جیوتی!
دیپک، جیسا کہ ایک مصور کو ہونا چاہیے بہت سنجیدہ انسان تھا۔ تاہم جب گونگی اس کے سامنےآکر عجیب عجیب مضحکہ خیز حرکتیں کرنے لگتی تو وہ بے اختیار ہنس پڑتا اور گونگی بھی اس کے ساتھ ہنسنے لگتی۔
اندرا کو جب کام سے فرصت مل جاتی اور دیپک بھی فارغ ہو جاتا تو دونوں دیر تک گونگی کے اشاروں سے محظوظ ہوتے رہتے۔۔۔ گونگی کے قہقہوں سے بھی معلوم ہوتا تھا کہ یہ قوت گویائی سے محروم ہستی اپنی محرومی و بیچارگی کو یکسر فراموش کرچکی ہے۔۔۔ اسے اپنے گونگے پن کا ذرہ بھر بھی افسوس نہیں۔ اور اس پر اندرا اور دیپک دونوں اظہار حیرت کرتے رہتے تھے
گونگی کے سپرد گھر کے کئی کام کاج تھے۔ تاہم وہ دیپک کی آمد سے پیشتر تمام فرائض پورے کرکے اندرا کے کمرے میں پہنچ جاتی اور جب تک دیپک وہاں موجود رہتا وہ چپ چاپ کوچ پر بیٹھی رہتی۔
دیپک کئی روز سے ایک تصویر بنا رہا تھا۔ اور اس تصویر کا موڈل تھی اندرا۔
جب تصویر مکمل ہوگئی تو گونگی بھی اپنی تصویر کی آرزو کا اظہار کرنے لگی۔
گونگی کئی دن سے اپنی آرزو کااظہار کر رہی تھی۔۔۔ جب دیپک آتا تو وہ اس کے سامنے سٹول پر بیٹھ کر اس طرح خاموش ہوجاتی گویا وہ موڈل ہے۔ اس پر اندرا بھی ہنس پڑتی اور دیپک بھی!
انہی دنوں اچانک اندرا کی طبیعت علیل ہوگئی۔ اب دیپک کا کام یہ تھا کہ دن کے کسی حصے میں اندرا کے یہاں آئے۔ اور اس کی حالت دیکھ کر واپس چلاجائے۔
جیوتی ایک طرف تورات کے دو دو بجے تک اپنی مالکہ کی خبرگیری کرتی رہتی تھی اور دوسری طرف نہ معلوم کیوں اس کی فطری شوخی غائب ہوتی جارہی تہی۔ وہ اب بھی ہنستی تھی۔ مگر یہ ہنسی پھیکی پھیکی معلوم ہوتی تھی۔ وہ اب بھی دیپک کے ساتھ اشاروں میں باتیں کرتی تھی۔ لیکن ایک جھجک۔۔۔ ایک خاص ہچکچاہٹ کے ساتھ۔
بعض اوقات رات کو اندرا کی آنکھ اچانک کھل جاتی تھی تو وہ دیکھتی تھی کہ جیوتی کوچ پر بیٹھی، فرش پر پڑی ہوئی انگیٹھی کی چنگاریوں کو ایک خاص محویت کے ساتھ دیکھ رہی ہے۔ اس نے گونگی سے اس تبدیلی کی وجہ پوچھنے کی کوشش کی مگر اول تو گونگی اپنی مالکہ کا مفہوم ہی نہیں سمجھ سکتی تھی۔ تو ذرا مسکرا کر خاموش ہوجاتی تھی!
ایک دن اندرا نے دیپک سے کہا۔
’’شاید ہماری گونگی ہم سے ناراض ہے، دیکھیے توآج کل کچھ خاموش اور افسردہ سی رہتی ہے۔ اس کی تصویر بنادیجیے نا!‘‘
’’بس اسی بات پر خفا ہوگئی ہے؟‘‘ دیپک نے ہنس کر کہا اور دوسرے دن جب وہ آیا تو جیوتی کا ہاتھ پکڑ کر اسے سٹول کی طرف لے گیا۔ جیوتی سمجھ گئی۔ اس کی آنکھوں میں چمک سی پیدا ہوگئی۔۔۔ ایک ایسی چمک جو بجھتی ہوئی چنگاری کے ایک دم روشن ہوجانے سے پیدا ہوجاتی ہے۔ لیکن دوسرے ہی لمحے میں چمک دور ہوگئی۔ دیپک نے دیکھا کہ گونگی بصورتِ انکار اپنا سرہلارہی ہے۔ دیپک نے بہیتری کوشش کی کہ وہ سٹول پر بیٹھی رہے۔ لیکن گونگی اٹھ کر چلی گئی۔ اندرا نے بھی اسے سمجھانے کی کوشش کی۔ مگر گونگی اپنی ضد پر بدستور قائم رہی۔
اندرا کہنے لگی۔۔۔ ’’بے چاری کئی روز سے کہہ رہی تھی میری خوبصورت تصویر بنادو۔ مگر آپ نے توجہ ہی نہ کی۔ گویا اس کا مطالبہ اپنے اندر کوئی طاقت ہی نہیں رکھتا۔ بے چاری خفا نہ ہوجاتی تو اور کیا کرتی!‘‘
اندرا نے یہ لفظ بڑی ہمدردی سے کہے۔ دیپک بولا۔ ’’اس کی خوبصورت تصویر کا تو کیا ذکر۔ یہ خود بھی خوبصورت ہے۔ اگر بیچاری گونگی نہ ہوتی تو نہ معلوم کتنی نگاہوں کا مرکز بن چکی ہوتی۔‘‘
اندرا نے اس کا کوئی جواب نہ دیا۔
دوسرے دن جیوتی خاص طور پر افسردہ تھی۔ اندرا نےاسے خود سٹول پر بٹھا دیا۔۔۔ یکلخت گونگی کا چہرہ شگفتہ ہوگیا اور وہ سرجھکا کر بیٹھ گئی۔
جیوتی کی تصویر بننے لگی۔
جب تک وہ سٹول پر بیٹھی رہتی تھی ایسی حرکتیں کرتی رہتی تھی گویا بہت پریشان ہے۔۔۔ دو تین دن کے بعد اس کی طبیعت میں سکون پیدا ہوگیا اور اب وہ دیپک کے منع کرنے کے باوجود اس کے چہرے کو ٹکٹکی باندھ کر دیکھتی رہتی تھی۔
تصویر مکمل ہوگئی۔۔۔ اپنی تصویر دیکھ کر اس کی باچھیں کھل گئیں۔
چند ہفتے گزر گئے۔ اندرا صحت یاب ہوکر دیپک کی زیر ہدایت کوئی نئی تصویر بنانے لگی۔
جیوتی کی طبیعت میں پھر تبدیلی پیدا ہوگئی تھی۔ اب وہ پھر ہر وقت پریشان نظر آتی تھی۔ پہلے اس سے مضحکہ خیز حرکتیں ہوتی تھیں۔ تو وہ دوسروں کے ساتھ خود بھی ہنس پڑتی تھی۔ اب وہ بھی اس قسم کی حرکتیں کرتی تھی مگر اس کی حرکتوں سے معلوم ہوتا تھا کہ وہ کھوئی کھوئی سی ہے۔
گھر میں اس کی افسردگی کے متعلق دو وجوہ پیش کیے جاتے تھے۔ دیپک کا خیال تھا کہ اسے اپنےوالدین اور رشتہ داروں کی یاد ستارہی ہے۔ اور اندرا کا خیال تھا کہ اب اسے اپنی بے چارگی کا شدید احساس پیدا ہوگیا۔ یہی وجہ ہے کہ وہ ہر گھڑی غمگین دکھائی دیتی ہے۔
ایک دن جیوتی اندرا کے ڈرائنگ روم میں جاکر دیپک کی تصویر دیکھ رہی تھی۔ یکایک ایک ہاتھ اس کے شانے پر لگا۔ اس نے مڑکر دیکھا اور بے اختیار ہوکر دیپک کے ہاتھ کو زور سے پکڑ لیا۔
دیپک نے قہقہہ لگاکر کہا۔ ’’ڈر گئی ہے، بیچاری!‘‘
’’دیکھ کیا رہی تھی۔۔۔؟‘’ اندرا نے پوچھا۔۔۔ ’’تمہاری تصویر۔۔۔ پگلی ہر وقت کھوئی کھوئی رہتی ہے۔ کل اپنی تصویر دیکھ رہی تھی۔‘‘
’’آخر اس کی پریشانی کی وجہ کیا ہے؟‘‘
’’میں خود بھی نہیں جانتی۔۔۔!‘‘ اندرا نے جواب دیا۔ جیوتی چلی گئی۔
’’اندرا اس کے باوا کو ڈھونڈو۔۔۔ ممکن ہے اس کی جدائی میں مغموم ہو۔‘‘
دونوں کمرے سے باہر نکل آئے۔۔۔ جیوتی دیوار سے لگ کر کھڑی تھی اور انگوٹھے کے ناخن سے چونا کھرچ رہی تھی!‘‘
(۴)
گونگی نے لاکھ کوشش کی کہ اپنے دل سے اس خوفناک جذبے کو نکال دے۔ جس کا زہر لمحہ بہ لمحہ بکھرتا چلا جارہا تھا۔ لیکن ایسا نہ ہوسکا۔ اس کا معصوم دل اور اس کا دماغ زنجیروں میں جکڑ دیا گیا تھا۔ ان زنجیروں کو توڑنا اس کے لیے بس کی بات نہ تھی۔ وہ رات کو بستر پر لیٹتی تو دل میں عہد کرلیتی کہ اب صبح ہرگز اندرا کے کمرے میں نہیں جائے گی۔۔۔ اب ہرگز دیپک کی صورت نہیں دیکھے گی۔ مگر جب صبح ہوتی تو ایک جذبہ بے اختیار اسے کشاں کشاں اس جگہ لے جاتا۔ جہاں چمکتی ہوئی دو بڑی بڑی آنکھیں اسےاس طرح محسور کرلیتیں۔ جس طرح سانپ کی آنکھیں پرندے کو محسور کرلیتی ہیں۔ اس کا ہر ارادہ دم توڑدیتا۔ اس وقت اس کی حالت اس پرندے کی سی ہوجاتی جس کے پرشکستہ ہوں۔ اور جو انتہائی بے چارگی کے عالم میں دور درخت کی ایک شاخ پر اپنے آشیانےکو دیکھ رہا ہو۔
اس کی زبان گونگی تھی۔ مگر دل تو گونگا نہیں تھا۔ اور اس کے دل کی زبان اس کی گونگی زبان سے نہ معلوم کیا کچھ کہتی رہتی تھی۔ لیکن جیسے ہی وہ اپنے خوبصورت جادوگر کے سامنے آتی۔ ’’آئیں بائیں‘‘ کے سوا اسکی زبان سے کچھ بھی نہ نکلتا۔
دیپک ہنس پڑتا۔ اور گونگی کے سینے کا شعلہ اور بھی بھڑک اٹھتا!
کئی بار اس نے تنہائی میں اپنے محبوب کے سامنے اپنی زندگی کے سب سے بڑے راز کو منکشف کرنا چاہا۔۔۔ اور جب کبھی اس نے ایسی کوشش کی اس کی بے معنی آواز دیپک کے قہقہوں سے ٹکراکر ہوا کی گود میں دفن ہوگئی۔
زندگی کی کتنی بڑی محرومی۔۔۔!
دیپک اس کی حرکات کو، اس کی بے معنی آواز کو کیا اہمیت دے سکتا تھا؟ وہ سمجھتا تھا گونگی بیمار ہے۔ اور بیماری ہی کی وجہ سے ایسی حرکتیں کر رہی ہے۔
اندرا کو اپنی خادمہ کا خاص خیال تھا۔ چنانچہ اس نے ڈاکٹر کو بلاکر گونگی کے علاج کا ارادہ کر لیا۔
ڈاکٹر نے گونگی کی تمام کیفیت سنی اور اس کا علاج کرنے لگا۔
گونگی نے یہ سمجھ کر کہ اس کا راز کسی دوسرے پر منکشف نہ ہوجائے۔ سنبھلنے کی کوشش شروع کردی۔ آخر اس کی کوشش کامیاب ہوگئی۔ اب ہر شخص کی نگاہوں میں گونگی صحت یاب ہوگئی تھی۔
(۵)
گونگی سوچتے سوچتے جھنجھلا اٹھتی۔۔۔ جھنجھلا جھنجھلاکر پھر سوچنے لگتی۔ وہ اپنے دل کا راز کیونکر اپنے محبوب پر ظاہر کرے؟ یہ بات اس کی سمجھ میں نہ آتی تھی۔ اس کی سب سے بڑی تمنا یہ تھی کہ اسے ایک لمحے۔۔۔ بس ایک لمحے کے لیے زبان مل جائے۔ اور اس ایک لمحے میں اپنے محبوب کو سب کچھ بتادے۔ لیکن اس کی آرزو ایک گونگی کی آرزو تھی۔۔۔ ایک قوت گویائی سے محروم عورت کی آرزو تھی۔ اس نے آنکھوں سے، ہاتھ کے اشاروں سے اپنے دل کی بات بتانے کی کوشش کی لیکن کون سمجھ سکتا تھا کہ وہ کیا کہہ رہی ہے۔۔۔ کون جان سکتا تھا کہ وہ کیا بتارہی ہے؟
چند دن سے اس کی بےتابی میں اضافہ ہوگیا تھا۔ وہ پہلے سے بھی بڑھ کر مضطرب ہوگئی تھی۔
آخر ایک تجویز اس کے ذہن میں آگئی۔ اور اس تجویز کے ذہن میں آتے ہی وہ ایک عجیب جنون میں گرفتار ہوگئی۔
اندرا نے حیرت سے دیکھا کہ وہ برش سے کاغذ پر ٹیڑھی ترچھی لکیریں کھینچ رہی ہے اور دیپک نے تعجب سے دیکھا کہ وہ بڑی سنجیدگی سے اپنے جنون کا ساتھ دے رہی ہے۔
کئی دن گزر گئے۔۔۔ کئی ہفتے گزر گئے۔۔۔ اب گونگی کا برش انسانی شکل بنانے میں کامیاب ہوچکا تھا۔ وہ دیپک کی تصویر کو اپنی خوابگاہ میں لے گئی جہاں اس کی اپنی تصویر لٹک رہی تھی۔ یہ وہی تصویر تھی جسے دیپک نے بنایا تھا اور جو جیوتی کو بےحد عزیز تھی۔
کئی اور ہفتے گزر گئے۔۔۔ اب گونگی کا جنون ایک تصویر میں منتقل ہوچکا تھا۔
تصویر میں دیپک کھڑا تھا اور جیوتی اس کے پاؤں پر اس طرح جھکی ہوئی تھی کہ اس کی دونوں بانہیں دیپک کی ٹانگوں کے گرد حمائل ہوگئی تھیں۔
گونگی نے اپنےکارنامےپر نگاہیں ڈالیں اور خودبخود شرمندہ ہوگئی۔
گونگی کا کام ختم ہوچکا تھا لیکن ابھی اس کا مقصد پورا نہیں ہوسکتا تھا۔ دیپک اپنےوطن میں تھا اور جیوتی اس کی آمد کا انتظار کرنے لگی۔
دیپک آگیا۔ اسے دیکھتے ہی گونگی کا دل دھڑکنےلگا۔۔۔ وہ اپنی خوابگاہ میں چلی گئی۔ پھر اس نےتصویر اٹھائی اور خواب گاہ سے نکل کر باغیچے میں جاکھڑی ہوئی۔
کافی وقت گزر گیا اور ابھی دیپک کمرے ہی میں تھا۔
جیوتی نے تصویر کو پودے کے سامنے رکھ دیا اور خود اندراکےکمرے کی طرف آہستہ آہستہ قدم اٹھانےلگی۔
ایک دو منٹ کے بعد وہ اندرا کے کمرے کی دیوار کے ساتھ کھڑی تھی۔ اس نے کھڑکی سے اندر جھانک کر دیکھا اور یکایک اس کی آنکھوں تلے اندھیرا چھا گیا۔
اندرا اور دیپک۔۔۔ دیپک اور اندرا۔۔۔ دیپک کے بازو اندرا کی گردن میں حمائل اور اندرا کے ہاتھ دیپک کے سینے پر۔
گونگی ایک لمحے کے لیے بھی وہاں کھڑی نہ رہ سکی۔۔۔ باغیچے کی طرف جانے لگی اور پودے کے قریب پہنچ کر کھڑی ہوگئی۔ پھر نشتر کی طرح ایک خیال اس کے دل میں چبھا۔ اس نے تصویر کو نکالا اور اسے پرزے پرزے کرکے ہوا کی لہروں کے سپرد کردیا۔
دیپک آیا۔۔۔ اس کا چہرہ چمک رہا تھا۔ گونگی نے اسے دیکھا اور اس طرح کھڑی ہوگئی جیسے پتھر کی بےجان مورتی ہو۔
دیپک کاغذکے پرزوں پر قدم رکھتا ہوا چلا گیا!
(۶)
جلتے ہوئے چراغ میں سے ایک دم تیل نکال دینے سے چراغ کی جو کیفیت ہوتی ہے وہی کیفیت جیوتی کی ہوئی۔ اس کی تمام امیدیں، تمام آرزوئیں خاک میں مل گئی تھیں۔ اس کے من کا دیپک بجھ چکا تھا۔ تاہم اس نے اپنی تمام تر توجہات گھر کے کاموں پر مرتکز کردیں۔ وہ صبح سے لے کر شام تک ایک مشین کی طرح کام کرتی تھی اور چاہتی تھی کہ ہر وقت کام کرتی رہے۔
آہستہ آہستہ اس کی طبیعت میں کچھ تبدیلی سی پیدا ہونےلگی۔
اندرا کی منگنی دیپک سے ہوگئی اور چند روز کے بعد شادی کی تیاریاں ہونےلگیں۔ جیوتی ایک وفادار خادمہ کی طرح شادی کی تیاریوں میں حصہ لینے لگی۔
ایک دن اندرا اور دیپک اس رشتے میں منسلک ہوگئے جس رشتے کو دنیا شادی کہتی ہے۔ چونکہ دیپک ایک غریب مصور تھا اس لیے سیٹھ بدری پرشاد نے اپنی بیٹی اور داماد کو اپنے بنگلے میں رہنےکی اجازت دیدی۔
اندرا گونگی کو اپنے لیے بہت بڑا ذریعہ تفریح سمجھتی تھی اس لیے وہ گونگی کو بھی اپنے ساتھ لے جانے لگی۔
گونگی نے اس کے ساتھ جانے سے انکار کردیا مگر اندرا کے سامنے اس کے انکار کی کیا حقیقت تھی۔
تینوں ہستیاں شہر کے باہر ایک شاندار بنگلے میں زندگی گزارنےلگیں۔
(۷)
کچھ دیر کے لیے گونگی کی طبیعت میں سکون پیدا ہوگیا تھا۔ مگر یہ سکون سمندر کے اس سکون کی مانند تھا جو ایک قیامت خیز اور خوفناک طوفان کی پیش خیمہ ثابت ہوتا ہے۔ اس کا دل ہر وقت بے چین رہتا تھا اور اس کا دماغ ہر لمحہ ایک کشمکش میں گرفتار۔۔۔!
وہ کوشش کرتی کہ یہ بےچینی دور ہوجائے۔ اس کے دماغ کو اس کشمکش سے نجات مل جائے۔ لیکن نہ تو بے چینی دور ہوتی اور نہ کشمکش سے نجات ملتی۔
کام کرتے وقت یا دل کو سمجھاتے وقت وہ سمجھ لیتی۔ کہ اس کے دل کا زخم ہمیشہ کے لیے مندمل ہوگیا ہے۔ مگر جیسے ہی اس زخم میں ایک ٹیس سی اٹھتی وہ پریشان ہوجاتی۔ اور یہ پریشانی اس کے زخم میں نشتر سا چبھوکر زخم کو اور گہرا کردیتی۔
ایک دن اس نے گھر سے بھاگ جانے کا ارادہ کرلیا۔ وہ یہ ارادے لے کر دروازے تک گئی۔۔۔ اچانک دیپک کا چہرہ نظر آگیا۔ اور وہ اس طرح لوٹ آئی جس طرح دریا کی لہر ساحل پر پڑی ہوئی کسی چیز کو بہاکر لے جاتی ہے۔
اس کے دل میں ہر وقت جذبہ محبت اور جذبہ خوف کے درمیان ایک کشمکش سی جاری رہتی تھی۔ کبھی تو خوف کا کثیف بادل محبت کی آگ پر اس طرح چھا جاتا کہ جیوتی اپنے چہرے پر ہاتھ رکھ لیتی اور بھاگ جانےکا ارادہ کرلیتی۔ اور کبھی یہ آگ اس طرح بھڑک اٹھتی کہ خوف کا بادل اس کے شعلوں پر دھوئیں کی باریک سی چادر بن جاتا۔
آخر وہ کب تک ضبط کرتی۔ اضطراب اور بے چینی کی چند لہریں اٹھیں اور اس کے سکون و ضبط کو تنکوں کی طرح بہا کر لے گئیں۔
جب کبھی وہ کمرے میں تنہا ہوتی اور سمجھتی کہ مالکہ دوسرے کمرے میں کام کر رہی ہے تو وہ دیپک کی قمیض کو سینے سے لگا کر زور زور سے بھینچنے لگتی۔
ایک دن وہ کمرے میں اکیلی بیٹھی تھی۔ اس کے سامنے دیپک کی تصویر پڑی تھی جسے وہ آنسو بھری آنکھوں سےدیکھ رہی تھی۔ اس نے لرزتے ہوئے ہاتھوں سے فوٹو کو اٹھایا اور اسے آنکھوں کے بہت قریب لےآئی۔
آنسوؤں نےاس کی آنکھوں پر اس طرح نقاب ڈالی ہوئی تھی کہ وہ اپنی مالکہ کو بھی نہ دیکھ سکی جو اس کی دائیں جانب کھڑی اس منظر کو سخت حیرت کے عالم میں دیکھ رہی تھی۔
اندرا آج تک اس قدر حیران نہیں ہوئی تھی۔
وہ چپ چاپ کمرے سےنکل گئی۔ اس کے دل میں ایک کانٹا سا چبھنے لگا تھا۔ میرے شوہر کے فوٹو کو اس عالم میں دیکھنا۔۔۔ آخر یہ کیا معمہ ہے؟ گونگی کو ہو کیا گیا ہےآج؟ پاگل ہوگئی ہے۔۔۔ پاگل۔۔۔! اس نےمیرے فوٹو کو کیوں نہیں دیکھا؟ خاص طور پر دیپک کے فوٹوں کو کیوں دیکھ رہی ہے؟
اندرا اس دن شام تک انہی خیالات میں غرق رہی۔
ایک دن بارش ہو رہی تھی۔ جیوتی کسی کام کی غرض سے صحن میں سے گزر رہی تھی کہ اس کا پاؤں پھسلا اور وہ دھم سے زمین پر گرپڑی۔ دیپک بھاگ کر اس کی طرف گیا اور اسے بے ہوشی کی حالت میں اٹھاکر کمرے کی طرح لے جانے لگا۔
’’بیچاری بے ہوش ہوگئی ہے۔‘‘ دیپک نے اپنی بیوی سے مخاطب ہوکر کہا۔ ۔۔ بیوی نے دیکھاکہ گونگی کی بانہیں اس کے شوہر کی گردن میں حمائل ہیں۔
’’اسے چارپائی پر لٹا دیجیے!‘‘ اندرا نے چیں بہ جبیں ہوکر کہا۔
’’لٹاؤں کیسے؟ دیکھو تو بےچاری کا کیا حال ہے؟‘‘
اندرا نے گونگی کی بانہوں کو زور سے جھٹکا دیا۔ گونگی نے ایک ہلکی سی چیخ کے ساتھ آنکھیں کھول دیں۔
دیپک نے اسے چارپائی پر لٹا دیا اوراپنی بیوی پر خفا ہونے لگا کہ اس نے جیوتی کی بانہوں کو جھٹکا دے کراسے ڈرا دیا تھا۔۔۔ واقعی اس وقت گونگی کی حالت ایک خوفزدہ ہرنی کی سی تھی!
اس کےبعد جیوتی کی طرف سے اندرا بدگمان ہوگئی۔۔۔ اس کا رویہ یکسر بدل گیا۔ وہ بات بات پر جیوتی کو برابھلا کہنےلگی۔ بلکہ بعض اوقات فرطِ غم و غصہ میں اسے تھپڑ بھی لگانےلگی۔
ایک دن اس نے گونگی کی پسلی پر زور سے لات ماری۔ گونگی درد سے بلبلا اٹھی پھر چپ چاپ اپنےکمرے میں چلی گئی او رچارپائی پر گر پڑی۔
صبح اندرا اور دیپک نےدیکھا کہ گونگی بنگلے میں نہیں ہے۔
دیپک حیران تھا کہ وہ کہاں چلی گئی ہے۔۔۔ اور اندرا مطمئن تھی کہ بلا سے نجات مل گئی۔
(۸)
گھر سے نکل کر گونگی حیران تھی کہ کدھر جائے، کہاں جائے۔ اس نے چاہا کہ پھر گداگری کرکے گزارہ کرے لیکن اب یہ اس کے بس کا روگ نہ تھا۔ اس نے چاہا کہ اپنی زندگی کا خاتمہ کردے۔۔۔ لیکن ابھی وہ دریا سے کچھ دور ہی تھی کہ بھوک اور پیاس کی شدت سے بےہوش ہوکر گرپڑی۔ حسن اتفاق سے گاؤں کے زمیندار کی دونوں لڑکیاں گاڑی میں بیٹھ کر ادھر سے گزر رہی تھیں۔ انہوں نے ایک عورت کو بیہوش دیکھا تو از راہ رحم اس کے پاس گئیں اور اسے ہلانے لگیں۔ گونگی نے آنکھیں کھول دیں۔
لڑکیوں نے اسے بہیترا بلایا لیکن وہ انہیں ٹکٹکی باندھ کر دیکھتی رہی۔
لڑکیاں اسے گاؤں میں لے گئیں۔ شام کے وقت کہیں جاکر گونگی نے اشارے کیے۔۔۔ گھر والوں نے سمجھ لیا کہ بے چاری گونگی ہے۔ گونگی اب وہیں رہنے لگی۔
(۹)
دیپک پر ایک خوفناک بیماری کاشدید حملہ ہوا۔ جس نے اس کے چہرے کی تمام خوبصورتی چھین لی۔ اب وہ چند قدم بھی چلتا تھا تو اس کی ٹانگیں لڑکھڑانے لگتی تھیں۔
ادرا کو کبھی خیال بھی نہ ہوسکتا تھا کہ اس کاحسین شوہر اس قدر بدصورت۔۔۔ اس درجہ کریہہ المنظر ہوجائے گا۔
شوہر کی بدصورتی نے اس پر خاص اثر کیا اور اس کا نتیجہ یہ ہوا کہ یہ اب اس کے دل میں شوہر کی وہ محبت نہ رہی جو پہلے تھی۔
شدید بیماری نے دیپک کے مزاج میں چڑچڑاپن پیدا کر دیا تھا۔ اور یہ چڑچڑاپن اندرا کے لیے ناقابل برداشت چیز تھی۔ چنانچہ ہر روز ان دونوں میں تکرار ہوتی تھی۔ اسی طرح دن گزر رہے تھے۔
دیوالی کی رات تھی۔ اندرا کا بچہ کھلونوں کے لیے ضد کرنے لگا۔۔۔ اندرا اور دیپک دونوں بچے کو ساتھ لے کر بنگلے سے نکل آئے۔۔۔ زمیندار کی لڑکیاں بھی گونگی کو ساتھ لیے بازاروں میں گھوم رہی تھیں۔ گونگی ان کے پیچھے پیچھے چیزیں اٹھائے چلی جارہی تھی کہ اس کی نظر اندرا پر پڑی۔ پھر اندرا کے چہرے سے ہٹ کر دیپک کے چہرے پر۔۔۔!
حیرت سے اس کی آنکھوں کی پتلیاں پھیل گئیں۔
اس نے اپنی آنکھوں کو دو تین بار ملا۔ مگر اس کے سامنے دیپک ہی کھڑا تھا۔
گونگی کے دل میں بیسیوں نشتر چبھ گئے۔ زمیندار کی لڑکیاں تو ہنستی ہوئی آگے نکل گئیں اور انہیں گونگی کی اس وقت خبر ملی جب وہ ٹانگے کی لپیٹ میں آکر زخمی ہو چکی تھی۔
(۱۰)
گونگی پہلے سے بھی بڑھ کر بیتاب ہوگئی۔ اس کے دل کا زخم جس کی خونفشانی بند ہوگئی تھی، اب پھر پھٹ گیا تھا۔۔۔ اس کامحبوب شدید بیمار ہے، یہ خیال ایک لمحے کے لیے بھی اسے نہیں بھولتا تھا۔ ایک لمحے کے لیے بھی اس کی بے قراری کم نہ ہوتی تھی۔ وہ کوئلے سے دیواروں پر دیپک کی تصویر بناتی تھی اور پھر اسے مٹادیتی تھی۔
اس کی سب سے بڑی۔۔۔ سب سے آخری آرزو یہ تھی کہ ایک بار اپنے محبوب کو دیکھ لے۔ اسے یقین ہوگیاتھا کہ وہ عنقریب مر جائے گا۔
ایک طوفانی رات تھی۔ ٹھنڈی ہوا کے جسم خراش جھونکے شور پیدا کرتے ہوئے چل رہے تھے۔ اس وقت جو حالت فضا کی تھی وہی گونگی کے دل کی بھی تھی۔ وہ بےقراری سے مغلوب ہوگئی۔۔۔ اسے خود بھی معلوم نہ ہوا کہ وہ کیا کر رہی ہے۔ اس وقت اسے ہوش آیا جب وہ لالٹین اٹھائے تیزی کے ساتھ چلی جارہی تھی۔
بارش۔۔۔ چیختے ہوئے تیز، تند اور ہنڈیوں میں شگاف کرتے ہوئے ہوا کے جھونکے۔۔۔ گونگی تیز چلی جارہی تھی۔
ایک جگہ پہنچ کر وہ دھم سے گر پڑی۔ اس کی ٹانگں پر کئی زخم آئے اور پاؤں خون آلود ہوگئے۔ مگر وہ ایک کراہ کے ساتھ پھر اٹھی اور زیادہ تیزی سے چلنےلگی۔
آخر گونگی بنگلے کے قریب پہنچ گئی۔
(۱۱)
دیپک اپنے کمرے میں تنہا لیٹا ہوا تھا۔ وہ تنہا تھا اور شدید بیمار۔ بیوی ناراض ہوکر میکے چلی گئی تھی۔
یکایک اس نے قدموں کی چاپ سنی۔ وہ بجلی کا بٹن دبانےکے لیے اٹھا۔ ابھی اس کا ہاتھ بٹن تک نہیں پہنچا تھا کہ فرطِ ضعف سے گرپڑا۔ اسے یوں محسوس ہوا جیسے اس کی ہڈیاں پیس دی گئی ہیں۔
فضا میں آں واں کی سی آوازیں آنے لگیں۔ دیپک نے سر اٹھا کر دیکھا۔
روشنی۔۔۔ اور پھر گونگی کا چہرہ۔۔۔!
’’جیوتی۔۔۔؟‘‘ دیپک نے حیرت سے کہا۔ ’’تم یہاں جیوتی؟‘‘
جیوتی آگے بڑھ آئی۔ اس نے لالٹین کھڑکی کے قریب رکھ دی۔۔۔ دو تین لمحے خاموش۔۔۔ ساکت کھڑی رہی۔ اور پھر بے اختیار ہوکر اس نے دیپک کے ہاتھ پکڑ لیے۔
ہواکے تند جھونکوں سے کھڑکی کھل گئی۔ لالٹین دوسری طرف جاگری۔ کمرے میں اندھیرا چھا گیا۔
بجلی چمکی۔۔۔ جیوتی نے اپنے محبوب کے چہرے کو دیکھا۔۔۔ اس کے ہونٹ ہلے۔۔۔ اور فضا میں ایک آواز پیدا ہوئی۔ ’’دی۔پک‘‘۔
دوسرے لمحے میں گونگی کا ٹانگیں لڑکھڑائیں اور وہ دھم سے گرپڑی۔
(۱۲)
صبح اندرا ہزاروں شکوے اور شکایتیں لیے ہوئے بنگلے میں داخل ہوئی اور جلدی جلدی قدم اٹھاتی دیپک کے کمرے میں آگئی۔
وہاں پہنچتے ہی۔۔۔ حیرت سے ایک قدم پیچھے ہٹ گئی۔
دیپک فرش پر گرا پڑا تھا۔۔۔ جیوتی بھی گری پڑی تھی۔ اس کی دونوں بانہیں دیپک کی ٹانگوں کے گرد لپٹی ہوئی تھیں۔
دونوں کے جسم سرد تھے۔
